Saturday, 29 October 2011

Sermon

MISSIONARY CHI HNIHTE CHAN INANG

- Rev. S. Lalkhuma


Lal Davida chuan Ziglak khua a a mite Amalek ho Aigupta ram a miten an run a, a nupuite pahnih pawh an lo la daih tih a hriatin a rilru a hahin a thin a rim em em a. Puithiam a rawn a, ral um tur chuan mi zaruk nen an kal ta a.A kawng a hlat avangin mi zahnih an chauva, Besor luiah an lo awm a. Mi dang zali te nen kal zelin Aigupta ram an zuk thleng a, an in ringlo lai nangchingin an sum lak zawng zwng te chu an zu chhuhsak ta vek a. An lo kir lehin Besor luia lo nghaktu te khan an lo hmuak a. Davida ruala kal thenkhat chuan an ral lak sumte pek ve loh an rawt a. Davida erawh chuan a hmun zu thleng lova bungraw lo vengtu te chu in ang renga ral lak sum insem tur a ni a ti thung (I Samuela;30;24) Ramthara rawngbawltute leh tirtu te hi Pathian mithmuhah in ang reng Misionary te kan ni. Awm hmun atanga mi tirhte tawngtai pui tak tak tu, thawhlawm thawh tak tak tu leh lo hre rengtu te chu awmhmun Missionary an ni.Thingtlang khua pakhata Missionary chawmtu Pitar pakhat chuan , nitin ka mi tirh tan leh a thawhsaka te tan ka pindan bikah hian ka tawngtai thin a ti. Davida sipai zali hruaite zinga then khatin ral do biktu ni a an in ngai ang khan ramthim hmuna rawngbawltu thenkhatte kan in ti Missionary bik fo va.Tawngtai leh thil peka min thlunzawm rengtu aia in dah san bik tur a ni chuang lovang. A hmun a zu thawk tha vak si lova,, missionary hming put ngaina ringawt kan nih phei chuan Pathian ngaihin kan quality chu a sang vak lo mai thei a ni. Misonary hmun thu leh kal chhuakte hian kan ram lak tawhte hi kan hauh nghal a, kan humhim nghal a pawi mawh a. Field chhunga ringthar tamtak an hnung tawlh a, a tira Baptistma chang an chhiar kim leh theih loh tak na chhan te hi kan ram lak kan ngaihsak zui loh vang a ni thei.Ring thar siama Baptistma chantir a nuam hle a, an mahni tawka puitling tura hauh ngheh zui tlat a pawimawh em em.Joshua hova an ram lak tawhte kha hmelma te an lak let tir leh ngai lo.Tirtu leh a hmuna thawktu te tan zui reng angai.

Davida hovin Aigupta a Amalek ho awmna an zuk thleng chu an tih tur ah an chiang bawk a, in zirtir chawp leh in rawn leh ngailovin an hna an thawk hmiah hmiah mai a.Tupawhin hah tak chung pawhin an bei zel a , an hlawhtling ta a ni.Field kal thleng tawh Misionary te hian mahni hna midang rawn lova thawh nachang hriat a tul hle.Hotute rawn a mawh phurh tir zel tum aiin mawh phur ngam ve in kan hriat chinah hi chuan biung ve mawlh mawlh mai ila ,hnehna kan chang zel mai dawn a ni. Mi thawhna leh mi awmna hmun leh mi tih dante kan kal chhuah hma a kan ngaih tuah ngai lemloh ang khan Field hmunah pawh hian heng thil ngaihtuah tam hi a tul lem lo. Nihna ni ngam a nih peih zel te, sawi loh tur sawi lo ngam a, sawitur sawi ngamte, thin rimna leh vuina khek khawm ngai loh te hi Misionary nun dik a ni.Lal Davida sipai te angin mi chak lo zawkte thawh kep peih leh mi dangte mizia ngaidam thei zel nun te Lalpan a ral do tu atan a mamawh thin ani. Chung lam Van Pathian order hmu, Misionary a koh leh tirh te vek kan ni . "Chanchin Tha hril mah ila chhuan tur reng reng kan nei silo " (I Kor;9;16)

0 comments: