Sunday, 30 October 2011

Synod News


Synod News

Synod Education Board rawngbawlna dinhmun tlangpui

1. Synod Higher Secondary School-ah hian tunah zirlai 918 an awm mek a. Kalphung angin an zinga 40% hi thingtlang lam mi an ni. Board Exam hnuhnung berah khan HSLC-ah pass percentage chu 98.06% a ni a, HSSLC Arts-ah 93.62%, HSSLC Science-ah 74.73% a ni. Thawktu zawng zawng zat chu 61 a ni a, hetah hian Principal leh Vice Principal te bakah non-teaching staff dang 13 an tel.

2. P.C. Girls School-ah hian zirlai 491 an awm a, Aizawl khaw pawn lam atanga kal 44 an ni. Kum 2010 session exam-ah 100%-in an passed. Thawktu 37 an awm a, Headmistress leh Asst. Headmistress te bakah non teaching staff 7 an tel. Kum 2011 atangin sawrkar thupek angin Cl. VIII hawn thar a ni a, section hnih an awm.

3. Kohhran mal kuta enkawl mek Presbyterian English School zingah HSLC Course zirna hawng thei kohhran pali- Zotlang (Champhai), Keifang, Khawzawl leh Darlawn te an awm a, heng High School palia HSLC exam beitute hi an vaiin mi 79 an ni a, pass percentage chu 98.73 a ni.

4. Mizoram pumah Presbyterian English School hi 86 a awm mek a ni.


Masihi Sangati Convention

October 28 - 30 chhung hian Masihi Sangati Convention, vawi 27-na neih a ni dawn a, Chanmari Pastor Bialin Chanmari West Presbyterian Kohhran Biak Inah an thleng ang. Kumin Convention-ah hian Speaker atan Rev. Vanlalbela a ni a, thupuiah ‘I thih hnu ah khawnge i kal dawn’ (Hebrai 9:27) an hmang ang.


Synod Mission Board

October 24 khan Patna Mission Field-a Arra khuaah Pastor Lalhminghlua’n ringthar, puitling hlir mi 6 baptisma a chantir. Tripura Mission Field huam chhungah tun hnai thla khat chhungin ringthar 52 neih belh a ni a, kumin (2011) chhung hian ringthar 1292 an awm tawh a ni.


Synod Literature & Publication Board

Synod Literature & Publication Board (SL&PB) meeting-ah thu ngaihtuah tur zingah Synod Newsletter tihchangtlun, Kristian Tlangau Bu-a Upa thite sunna an chanchin ziak dan kalphung mumal siam leh 2012 -2013 atana budget ruahmanna leh thil dang pawimawhte ngaihtuah a ni a. SL&PB atan Rs. 6,37,000/-, Kristian Tlangau atan 22,63,000/- leh Kristian Naupang chanchinbu atan Rs. 6,57,000/- ruahman a ni.