Monday, 7 November 2011

Sermon

KRISTA TAN I NUNG ANG U
-  Kaphranga

    “Tin, a nungte chu anmahni tan an nun tawh lova, an thih aia thi a tholeh atan chuan an nun tawh zawkna turin a ni, mi zawng zawng thih aiin a thih ni. Chu mi avang chuan tuna chinah hian keini zawngin tisa lamah chuan tu mah kan hre tawh lo vang; tisa lamah Krista chu lo hre tawh mah ila, tunah zawng kan hre leh tawh lo ve. Chu mi avang chuan tu pawh Kristaa a awm chuan thil siam thar a lo ni a, thil hluite chu a ral ta a; ngai teh u, alo thar ta”.(II Kor.5:15-17).
    Kan pianthar hnu hian Kohhranah te inhmangin theih ang tawk leh phak ang angah rawngbawlin Kohhran huang chhungah kan awm a. Kum a lo liam tam deuh chuan Sunday Sikul zirtirtuah te leh Kohhran Upa hialah te pawh a lo tan theih mai a. Chutih hunah chuan Bible aia ngainat zawk kan lo nei hman der mai a. A then chuan Kohhran inkaihruaina hi kan lo Pathian hman a, Isuan a hmangaih K.S kan tih te, zu ngawivei te, drugs ngawlveite kan haw em em a. Ngawlvei nia kan hriat chu Biak Inah rawn inkhawm ve mahse kan rilruin anmahni a pawm theilo  fo, ngawlvei ve lem lote chu kan ngai tha zawk tlat a. Mi rel kan ching a, lansarh kan khel a, kan thiltih vete miin hria se kan ti a, fak nih kan duh a, a tha ber nih vek kan duh a ni deuh ber mai. Hetih lai ngat hi chuan tu mah hi mi fel leh tling kan hmu lo, mahni chauh hi fel leh tlingah kan inhmu thin.
    Aw le, kan zoramah hian Setana hian kan thalai zingah te, nu leh pa naupangte a finna hmangin min bei thin a. Kristian rama kan inchhal avangin Kohhran huang chhung ni lo, a pawnah chuan Setana hian a duh tawk a ngah tawh ni berin a lang a. ‘Khaw nge Kohhran huang chhungah hian kantal luh loh chuan ka sipai thate an piangthar leh thin a,’ tiin Kohhran ah a rawn zuang lut a, a tum ber chu Kohhran tichhiat hi ani.
    Chuvang chuan Kohhran a tihchhiat theih nan chuan piangtharho bawk a hman a ngai a. Chuvang chuan a ni, kan sawi tak angin Isuan a hmangaihte huat min zirtir a, Isuan a duh hauh loh eiru te, thamna la te, kan hriat ruk reng a ruka zu in reng te, a ruka mipat hmeichhiatna hmang rengte kan hai der lui thei a, chung sual ti lai lo hmu vetute chu kan huat ngawih ngawihhote an ni lawi si a; chuvang chuan kan huata te khan vanram kai leh kai lo tur an hre ta em em mai a, kan tente khan min teh ten a, keini’n kan ten bawk a, kan inmil thei ta reng reng lo a ni.
    Aw le, unau duh tak, ngun takin ngaihtuah vang vang teh, Isua tan i nung tak tak em le? Bible chuan Isua thih chhan a sawiah khan Isua tana nung turin min ti a ni. Krista tana nung si lo hian Kohhran tan chauhva nun hi a va awl em! Isua tana i nun dawn chuan Bible thu anga i nun a ngai a, i ni tin nunah Bible thu aia pawimawh a awm lo va, mi duham thin kha a duham ta lo va, thinchhe thin kha a lo zaidam ta. ‘Mi zawng zawng aia sualah inruat rawh u,’ Bible-in a tih te kha hman a tum ta hram hram a; Isuan a hmangaihte kha a hmangaih tan ve ta a.
    Bible atanga inzir a nih avang khan mite hmuh dan pawh a lo danglam ta a. Hnung lama thil awm te a theihnghilh a, hma lam chauhva thil lo awm turah pathian duh dan a thlir thin avangin mite hmuha a lo danglam ta, mite chuan a hmelah Isua an lo hmu ta thin a ni. Ni danga amah hnaih ngam lo leh hawtute khan a bula awm an chak a, an ngaina em em thin. Amahah thil hlui a ral a, thil thar a lo lang a. Kohhran tana thahnem a ngaih dan pawh Isua hmangaihte Kohhrana hruai luh a lo ni ta zawk a. Isuan tlangchhipa khaw awm a sawi angin thuhruk theih a ni ta lo; a hlauh ber chu Isua kut ruaka tawh a lo ni ta. Unau duh tak, Isua Krista tan chauha nung turin Lalpan a sawm che ani.
Lalpa chu fakin awm rawh se. Amen.

0 comments: