Sunday, 26 February 2012

Article

RIMAWI (MUSIC)
                                     -  Apuii pa.
    Rimawi (Music) han tih hian a tawi zawngin  Aw (Vocal) emaw  hmanraw hmanga rimawi siam chhuah (Instrumental Sound) tihna ani mai a, an pahniha lak kawpin  awmze nei zawka mawi taka duan chhuah (Beauty of form) hnuah, ri inhmeh tak hmanga a ruala kan tih rik chhuah (harmonise) hian Rimawi (Music) ngaihnawm tak alo ni thin. Ri nazawng hi rimawi nilovin awmze neilo, bengchheng leh ninawm te pawh ani ve thei bawk awm e.
    Football ngaina leh tuipui  nazawngin a khelh an thiam vek kher lo, a entu mipui, coach, manager leh players te chu a kila lung pawimawhber an ni theuh angin, Rimawi pawh hi sawi a thiam (theory) leh a taka tum thiam (Practical) a awm theih a, chu mai pawh nilovin ngaihthlatu (Audience) nih chauh thiam pawh kan awm bawk, a khawimah hi sawihran chi a nilo, heng ho infinkhawm chauh hian ani  Music ropuina leh hlutna pho chhuak thin chu.   Aw (Vocal) thung chu St. Augustine-a chuan “Vawikhat zai hian vawihnih tawngtai kan ni” (To sing once is to pray twice) a ti hial a, keini Mizo Christian te ngat phei chu zai leh lama Pathian fak hi kan chaw tui ber pakhat ani si a, hla kan han nawn tlut tlut te hian kan tawngtai mawlh mawlh thin tihna alo ni reng mai a ni chu. 
    Music ah hian Genre chi hrang hrang a awm teuh a, rimawi hmanrua pawh a tam na ngiang mai, Biakin bik a  kan hman thin tlemte chauh hriatzaunan sawi ila, Tunah chuan Church Music aiin Contemporary Worship Music kan uar mah zawk  a, a huangchhung hi a zau  hle, chung zinga ami Popular Music leh Soul Music hi kan hmanlar pawlte chu an ni mai awm e. Heng Music hi 1960 vela lo intan tawh 1970 bawr chho vela rawn lar ta em em mai a ni, keini tan bik phei chuan Mizo kuthnu nen a inrem bik riau a ni.
    Hmanraw tamtak zinga mi keyboard/Piano ah hian tunhma chuan Organ ri an hmang deuh ber a, kut veilam a plucking in chord an siam a, dinglam a hla note sak tir chungin zai an hruai thin, professional tur phei chuan kutzungtang hmandan kalphung (finguring system) thiam nal hle a ngai. Tuna  kan hman danah lengkhawm hla  bikah chuan vei lamin Bass Voice kan hmang a ding lamin Clear Sound a kan duhber  hmangin beat kan siam mai a, a mawlmang aiin hla nen a inrem a kan tuipui hle bawk. He tumdan rawn ti lar chhuak hmasatute chu Gospel Reapers Team te an ni a tih theih hial awm e. Tonic Solfa lam kan sak erawh chuan a remdan kalhmang kan ti danglam leh deuh a, a tlangpuiin Plucking in  a hla vuakkalz dan (Rhythm) milin kan cheibawl ani deuh ber. Zai hruai nan Khuangpui (Bass Drum) leh Khuangte (Snare Drum) chauh hi kan hman ber ani a, pakhat chauh pawh kan hmang mai thin bawk. Khuang hi Metronome, Beat leh Tempo a hun vawngtu pawimawh tak a ni.
    Keini College Veng Kohhran pawh kan changkang chho ve zel a, Biakin a hla sakte pawh a nuam thin khawp mai. Lengkhawm hla kan sa thiam viau, Tonic Solfa erawh bah deuh mahila kohhran zaipawla tel thinte leh a thiam ten part chi kimin sa zel thei ila, a thiamlote tana inzir pahna ni bawk nen  a mawiin kan hlawkpui thin ngawt ang.
    Tonic Solfa bikah khuangpu te pawh an thiam tlang khawp mai, hmasawnna tur erawh tlem kan la nei, thenkhat hla lak muan leh ran (Tempo) lamah achanga hnuk/pawt a, achanga hma hret thin te,  hla chang (Verse) luh leh dawn a hla thluk vuak (Measure) lak hun inanglo, achanga hma, achanga tlai te leh vuak (Metronome)  ngai pat tur bai leh ban deuh changte hian, Music hre vak lemlo tan pawh inngaichang run chungchuan zai tui chu har ve tak a ni. Khuang vuak rin leh zawih hun (Pitch Bend)  pawh hriat atan tha hle. Hma kan sawn zel turah ngai ila.
    Keyboard/Piano lamah Minor Cord hla chu kan rem diklo nilovin kan inzir hle ala ngai awm e, kan thiamlo ani ber mai. Khuang chauhin min hruai ta mai se a zia deuh awm e. A vuakkah dan-ah Fingering System  tih dik a ngai em em a,  hla thenkhatah Strings Voice hmangin sustain/reverb tlem telh belhin rhythm hlang a rem mai hi a awl deuh. . Hla reng rengah Chord tih dik a pawimawh hle, entirnan “Min vengtu chu Lalpa ani’ etc. thluk hnihna ah Major Chord F ani a  Off Chord G a luh ngaih changte a awm a, hla dang ‘khawngaihna mak mawi leh duhawm’ etc. ah te hian Saprano tan chauh chuan Major key a rem tlang ngaihdam ve theih mai, Bass emaw Contralto  an awm erawh chuan Minor a luh ngai ngei ngei a awm thin a, an luh siloh chuan Part petu tan a lai (False Chord) ta hu mai emaw tih pawh awl tak ani thin. Heng hla kan sawi tak ang hi Kristian Hla Bu ah hian a tam a ni. Thenkhat duh hun huna Minor, Sustained leh Diminished Chord a luh ching an awm thin, a hun hma a Key thlak  ching thin te  nen an danglamna a awm chuanglo a ni.
    Kan sawi tak te hi a bultanna chauh ani awm e. Kan Kohhran rimawi tumtute leh abik takin thalai  zawkte phei chu an thiam em em tawh a, an taima in an inpekna te a ropui hle, an fakawm thlawt a ni. Han inzir deuh sela chuan Kohhran tana chhenfakawm tak ni thei vek tur an ni hlawm. An ziah tur awmzawk tak mahnise bah nuaihin ka han thai lang ve zuai ani e.     
  

0 comments: