Sunday, 17 February 2013


KTP   Rorel   Inkhawm   2013   Inbuatsaihna

February 9 -10 khan KTP Rorel Inkhawm 2013 thlengtu Lunglei lam inbuatsaihna enpuiin Upa Zonunmawia, CKTP General Secretary, Pu Saizamliana Sailo leh Pu Lalnghinglova Hauzel, CKTP Committee member-te Lungleiah an zin phei a. Inkhawmpui nghahna hmun Lunglei Chanmari Biak In te enin Organising Committee te nen Synod House-ah inkawmna hun tha tak an hmang.

KTP Rorel Inkhawm 2013 hi Lunglei Chanmari Bial leh Venglai Bial ten inthlen tawmin Chanmari Kohhran Biak Inah nghah a ni dawn a, rorel palai 1,000 chuang beisei an ni. Chanmari Biak In kawtzawl leh a sir tuakah hulhliap tha tak zarzawm a ni tawh a, Biak In thlang basketball court-ah Fellowship neihna tur bik Stage tha tak 34ft. X 24ft. sak zawh tawh a ni a, a cheimawi hna thawh mek a ni. Organising Committee hian sum senso tur Rs. 5,90,000/- a ruahman a, sawrkar-a inhlawhna leh mi thahnemngaite inpekna atangin an budget hi tlin ngei an inbeisei a. Tin, a thlengtu Chanmari Kohhran hian Pandal leh Fellowship neihna tur bik cheibawlna atan hian Organising Committee sum pui hmang lovin Rs. 4,00,000/- budget an insiam a, Rs. 3,00,000/- vel sen ral a ni tawh. Sub Committee hrang hrangte inbuatsaihna a kal tluang hle a, thahnemngai takin mahni zawn theuhah hma an la mek a ni. Organising Committee hian rorel palaite pualin March 2, 2013 (Inrinni)-ah ruaipui buatsaih tumin Ruai Sub-committee a din tel a. 
Rorel Inkhawm (March 1-3) chhunga Pathian Biak Inkhawm hrang hrang leh March 2 (Inrinni) chawhnu lama Saikuti Hall-a Fakna Inkhawm chu Synod Information & Publicity (Synfo)-in video-in an cover vek dawn a. Synfo thlalak hi JB Cable leh LDF Cable TV-ah live-a pek chhuah turin inbiak fel a ni tawh a, Aizawl lamah pawh an lo hmuh ve thuai theihna tur ruahmanna siam a ni bawk. Sound lam chu Beta (Lunglei) leh Active Sound (Aizawl) ten an buaipui dawn a, Beta hian Saikuti Hall programme bikah mawh a phur ang a, a dang zawng chu Active Sound-in an tum ang. Lunglei lam hian Presbyterian Kohhran programme lian tham an thlen vawi khatna tur a ni dawn a, Chhim Bial Administrative Secretary Rev. F. Lalrinnunga kaihhruainain phur takin theihtawp an chhuah mek a ni.

0 comments: