Saturday, 4 May 2013

LALPA KOHNA

- Raymond Lalnunsiama

    Israel mipui ten Pathian hnenah Lal an dil a. Pathian in Benjamin a thlah a mi - thlahtute a tanga mi chak leh huaisen Saula chu Israel Lal atan a pe ta a. Lal Saula Lal hnuah chuan Israel mipuite pawh an thla a muangin, an hmelma Moab hote, Amona thlahte, Edom hote, Zoba hote, Philistia mite a do a,  Pathian in a awmpui avangin A thlekna leh a do apiang a hneh zel mai a ni. Aigupta sal atanga an chhuah laia lo dodaltute Amalek ho te kha Pathian in a theihnghilh hauh lo mai a; Lal Saula chu Amalek ho do tur leh A hmei a pa, an ranrual chena that chimit vek turin Lalpan a ti ta a. Amaherawhchu Lal Saula chuan Lalpa thuawih lovin, Amalek ho lal Agaga a man a, an ranrual zinga a thau tha tha an hawn a, a cher cher chauh a that a ni. Lal Saula chungah Pathian a lungni ta lo, Zawlnei kaltlangin Lalpa thu a awih loh avangin Israel te Lal atan Pathian in a hnawl tawh thu a lo thleng ta nghal a ni.
    Rawngbawl tura koh / ruat kan nih tirh chuan kan INSIT, TLinglo kan inti a, kan huphurh em em a, chutih rualin Kan phur em em thung si a. Kan han in hmang rei deuh va, Khawngaih rawngbawl hna a ni tih theihnghilhin kan theihna, kan chakna avanga thawk emaw kan inti fo thin. Chu chu kan chaklo na leh kan tlakchhiat bul tanna a ni fo thin.
    Rawngbawlna kawngah tha thawh ve tawk, senior ve thawkhatah kan inhriat hnu phei chuan  Lal Isua nise engtinnge a tih ang? tih lam aiin Ka ngaihdan chuan tih hi kan ti langsar zawk ta thin.
    Pathianin Lal Saula indonaa hnehna a chan tam lam a en lova, a ngai pawimawh ber hek lo. A ngaih pawimawh ber chu a a thu a awih leh awih loh lam kha a ni. Rawngbawlnaa ke i pen rei tawh leh tawh loh te, harsatna i paltlang tam tawh lam te, i sum leh pai i sen tam leh tam loh lam Lalpan a thlir lo. A koh chhan che tuna i kova RAWNGBAWLNA a dah mek kha i hlen tha em tih lam a ni a en zawk ni. I châkna leh i tuina te, i phurna zawnah kher khan Lalpa in kohtir tum suh. Lalpan a duhna leh mamawhna hmun a awm turin nangmah kha inpe zawk rawh.
    Rawngbawltute hian engnge kan rinchhan ber le?  Kan sum leh pai, kan thiamna leh kan chakna te, kan talent dawn te hi inchhuan phah nan kan lo hmang palh ang e. KTP Branch leh Kohhran te pawh hian kan property neih that te, kan sum thawhchhuah tam te hi kan chapo pui palh hlauh dah ang e. Goliatha chuan Khandaih te, fei te, feite te a rinchhan a, Davida erawh chuan Pathian a rinchhan thung a, Pathian rinchhantu zawk kha a dingchang a ni tih kan hriat kha.
    Anih KTP member te hian engnge kan rinchhan? Khawvel thila rinna nghah a tlo lo a, Pathian rinchhan a beih hi a dinchang thin tih hi kan hriat thar leh a tha khawp mai. Harsatna lo thleng tur te, kan tawrh tur te, kan chân tur te kan thlir chuan, KTP a tel loh mai, rawngbawltu nih loh mai te hi a chak awm rum rum thin. Lalpa hminga chan i inhuam poh leh Lalpa malsawmna i tawngbua ang. Lalpa kohna che thuawih taka i chhan phawt chuan - engkim neitu Lalpa chuan a theihnghilh lovang che. David khan Goliatha bei turin Lal Saula ralthuam a kalpui zo lo, ama hmanraw hman thiam VIr VAwm ngei kha Goliatha hneh nan a tawk. Keini pawh mi talent neih ang te, mi thiam ang te, mi thlarau thilpek an dawn ang te, Kohhran a mawhphurhna an chan ang te kan chang lo a ni mai thei.  Pathian hian kan zawh tawk ang ralthuam hi keimahniah a dah theuh a, chumi chu kan hman thiam phawt chuan Lalpa rawngbawlna atana a tawk a, sual hneh nan pawh a lo tawk reng mai.
    Lal Saula Israel Lal atana Pathian in a hnawl atang khan a nun kha hreawm takin a hmang a ni tih kan hriat kha.  Lalpan min kohna hi kan thawk tha peih lo a nih chuan khawngaih rawngbawlna atang hian min hnawl ve ngei ngei dawn. Keini aia tha, keini aia fel, keini aia inpe leh thawk hlawk tur hi Lalpan englai pawhin a nei reng a, mimawl ber leh tawmkai lo ber ni a kan hriatte pawh hi Lalpan hmanrua a a hman duh phawt chuan a tifing thei a ni tih hi hre thar chungin Lalpa kohna hi a thara chhang turin i inbuatsaih ang u.

0 comments: